O 2024 está a ser un ano de transformacións no IGFAE. A apertura da nova sede, que se completará nuns meses, xunto á concesión das acreditacións da Unidade de Excelencia María de Maeztu e a rede de centros singulares da Xunta de Galicia, supoñen o inicio dun novo período, que consolidará ao IGFAE na vangarda científica nas súas áreas de investigación.
O IGFAE está formado por un equipo que supera amplamente o cento de persoas. Co seu labor diario demostraron a súa capacidade para acadar os fitos que hoxe sitúan ao centro como unha referencia.
No marco desta nova etapa, a Dirección e a Unidade de Xestión do IGFAE levan desde 2023 traballando, da man do estudo de deseño Novagarda, na renovación da identidade visual do centro. Esta nova imaxe aplicarase de maneira integral, tanto nas comunicacións internas como nas accións abertas á sociedade, e virá tamén acompañada dunha nova páxina web.
Nos vindeiros meses presentarase o novo manual de identidade visual do IGFAE, que incluirá todos os materiais e instrucións precisos para a aplicación completa desta nova imaxe.
Porén, co obxectivo de familiarizar ao persoal do Instituto con esta nova identidade, adiantamos aquí os requirimentos que se deben seguir, desde o 1 de xullo de 2024, en todas as comunicacións e actividades.
NOTA: O incumprimento destas instrucións pode causar serios inconvenientes na entrega de informes e memorias xustificativas, coa consecuente sobrecarga de traballo para o persoal da Unidade de Xestión e o risco de penalización nos fondos que recibe o IGFAE e o seu persoal investigador por parte das entidades financiadoras.
En caso de calquera dúbida ou consulta sobre estas instrucións, recoméndase contactar coa Unidade de Xestión e Comunicación: communication@igfae.usc.es.
Descarga todos os materiais nesta ligazón
Todos los logotipos están disponibles en su versión en positivo, en negativo (blanco) y en blanco y negro (para impresión).
En todos os documentos oficiais, presentacións, informes e comunicacións públicas, deberá utilizarse a familia tipográfica Roobert Pro, coas súas diferentes variables, que poden verse á esquerda deste texto.
Como centro mixto da Universidade de Santiago de Compostela e a Xunta de Galicia, o IGFAE debe visibilizar en todas as súas comunicacións a presenza da USC. Nesta nova identidade, o logo da Universidade aparecerá xunto ao do resto de entidades financiadoras, no mesmo tamaño e xerarquía.
