Proxecto MEDRA

O proxecto MEDRA (MediPIX para Estudo e Detección de Radiación nas Aulas) é unha iniciativa promovida polo EduLab do Instituto Galego de Física de Altas Enerxías (IGFAE). O seu obxectivo é que o alumnado de secundaria e bacharelato de Galicia desfrute da súa primeira experiencia investigadora en física nuclear de partículas. Neste curso 2024/2025, o certame celebra a súa terceira edición.

Para desenvolver o proxecto utilizaranse varios Minipix, uns detectores híbridos de última xeración desenvolvidos polo CERN (Organización Europea para a Investigación Nuclear). Estes aparellos funcionan como unha cámara, fotografando as pegadas que deixan as partículas procedentes do cosmos ou dunha fonte radiactiva ao atravesar o sensor. Estas pegadas indican qué tipo de partícula é, a súa enerxía, a carga eléctrica, a súa orixe e a súa traxectoria.

O profesorado recibirá una formación, prevista para o venres 15 de novembro de 2024 en horario de tarde, sobre o funcionamento do detector e a actividade a desenvolver, xunto coa guía docente elaborada para levar a cabo exercicios relacionados coa física nuclear e de partículas cun enfoque experimental e totalmente participativo na aula.

Despois, o IGFAE prestará un Minipix durante tres semanas aos centros seleccionados para realizar un experimento, que será proposto por eles ou asignado polo IGFAE, para a adquisición e análise de datos. Despois, terán que redactar un artigo científico cos resultados obtidos e envialo a unha revista científica do ámbito educativo para a súa publicación. En novembro, durante a Semana da Ciencia, o IGFAE organizará unha xornada na que alumnado e profesorado presentarán o traballo que realizaron, como nun congreso científico.

O profesorado interesado en inscribir ao alumnado deberá cumprimentar un formulario, no que responderán a diversas cuestións:

Gustaríavos ter unha primeira experiencia no mundo da investigación en física?

Hai un club de ciencias no teu colexio ou instituto?

Participastes, ti ou o teu alumnado, nalgún proxecto científico?

Sodes STEMBach?

Antes de dispoñer do detector, o persoal do IGFAE facilitará o manual do proxecto e outros materiais formativos para garantir o correcto uso do dispositivo. Durante todo o proceso, os grupos contarán coa colaboración e apoio do persoal do IGFAE para desenvolver o proxecto con éxito.

• O profesorado responsable do proxecto en cada centro seleccionado comprométese a asistir a unha sesión formativa o venres 15 de novembro de 2024, en horario de tarde.
• Cada centro disporá dun detector e o experimento realizarase en grupos reducidos duns 4 estudantes, a elixir polo docente, para o seu máximo aproveitamento. Nivel educativo suxerido: 4º ESO e 1º ou 2º de Bacharelato.
• O artigo científico redactarase en inglés, polo que é necesario que profesorado e alumnado dominen o idioma.
• O inicio previsto do Proxecto MEDRA é novembro de 2024 e o seu fin, maio de 2025. Os centros comprometeranse a terminar o proxecto iniciado e a asistir á xornada de final de curso.
• Os centros utilizarán o Minipix e custodiarano co maior coidado e seguridade durante todo o experimento.

Manual do proxecto MEDRA

Guía de actividades para docentes. Preme aquí para descargalo

Curso sobre o uso do detector MiniPix

Neste curso, que consta de cinco vídeos, poderás aprender as claves do detector co que se traballa no proxecto MEDRA