1ª edición Residencias ArtLab IGFAE
O IGFAE e a Fundación Cidade da Cultura de Galicia uníronse en 2025 para tecer fíos entre a física e a creación artística contemporánea galega, lanzando a primeira convocatoria das Residencias ArtLab IGFAE.
A proposta seleccionada foi “Outro e sobre si”, do artista Andrés Rodís (Santiago de Compostela, 2000), que desenvolveu durante varios meses a súa estadía no IGFAE e nos espazo REGA da Cidade da Cultura.
En outubro de 2026 inaugurarase unha exposición no Gaiás, na que se amosará o traballo realizado durante esta residencia.
Residencia 2025/2026
Andrés Rodís
Blog da residencia de Andrés Rodís
Tecendo fíos entre a física e a arte contemporánea
As Residencias ArtLab IGFAE ofrecerán ao proxecto elixido a posibilidade de traballar durante varias semanas no centro, que acaba de inaugurar a súa nova sede no edificio do Monte da Condesa.
Para familiarizarse coas diversas áreas da física nas que traballa o Instituto, habilitarase un espazo de traballo no propio IGFAE, achegándose así ás investigacións e proxectos do Instituto, os seus obxectivos, os métodos científicos empregados e os enfoques experimentais desenvolvidos.
Durante a estadía, a proposta seleccionada recibirá tamén titorización científica e artística, mediante colaboracións co persoal do IGFAE e profesionais con experiencia no comisariado e xestión de proxectos artísticos. A residencia tamén se realizará nos espazos REGA da Cidade da Cultura, onde poderá tirar proveito dun espazo de traballo propio e dos equipamentos, recursos técnicos e humanos da Cidade da Cultura.
Aberta a todo tipo de formatos
A convocatoria ábrese a persoas ou colectivos relacionados co contexto da arte contemporánea galega, en todo tipo de formatos artísticos (pintura, escultura, fotografía, artes de acción, arte obxectual, arte sonora, arte en rede, arte interactiva, arte participativa, entre outras). As propostas deberán abrirse ás novas perspectivas no campo da arte, da ciencia, da tecnoloxía e da sociedade, ben a través dunha obra totalmente nova ou da ampliación dunha obra en curso.
Financiamento
A proposta seleccionada recibirá unha achega de 8.000 euros, ademais do aloxamento nunha residencia universitaria durante o desenvolvemento do proxecto.
Bases da convocatoria e formulario de solicitudes
Convocatoria resolta
