Igualdade e diversidade

A fenda de xénero é un dos principais retos transversais nas áreas de investigación de Física de Partículas, Astropartículas e Nuclear, nas que traballa o IGFAE. Tanto no Instituto como no contexto global, a representatividade feminina e do colectivo LGBTI está por baixo do 30%, fronte a máis dun 70% de presenza de homes heterosexuais en practicamente todos os niveis da carreira investigadora.

Esta situación inflúe, sen dúbida, na convivencia cotiá do persoal e o propio labor investigador,  podendo xerar dinámicas que fagan persistir estes desequilibrios.

Neste contexto, o IGFAE márcase a redución da fenda de xénero e a promoción da diversidade como un dos eixos da súa actividade durante os vindeiros anos, fomentando a igualdade de oportunidades e promovendo activamente a contratación de persoal investigador de excelencia feminino, do colectivo LGTBI e incluíndo todo tipo de diversidades.

Desde o ano 2021, o IGFAE conta coa súa propia estratexia de Xénero e Diversidade. Este documento ofrece un contexto da situación o Instituto, e establece unha serie de accións para o seu cumprimento.

Seguirase, deste xeito, o camiño aberto con diversas iniciativas desenvolvidas nos últimos anos:

01

Accións

1. Masterclass Internacional de Física de Partículas co gallo do Día Internacional da Muller e a Nena na Ciencia (11 de febreiro). Dirixida a alumnas de 1º de Bacharelato de centros educativos de Galicia.
2. Charlas divulgativas sobre Física e Diversidade nos centros educativos de Galicia, facultades da USC e outras institucións
3. Oferta de formación en perspectiva de xénero na investigación para o persoal científico e de xestión do IGFAE
4. Reunións mensuais do Grupo de Traballo de Xénero e Diversidade
5. Uso da linguaxe inclusiva nos materiais de comunicación externa

02

Colaboracións

– En xuño de 2020 o IGFAE sumouse á rede GENERA (Gender Equality Network in Physics in the European Research Area), cuxo obxectivo é apoiar, coordinar e mellorar as políticas de igualdade de xénero nos centros de investigación de física en Europa, e a nivel global. Neste marco, o IGFAE participou nunha proposta COST, denominada BIRDIE.

– Participación no Grupo de Traballo de Xénero na Rede SOMMa.

03

Outros documentos de interese

• Plan estratéxico para a Igualdade de Oportunidades da USC
• Protocolo de prevención e acción contra o acoso da USC
• Protocolo de actuación para os cambios de nome e de mención relativa ao sexo das persoas transexuais, transxénero e intersexuais na USC

• Medidas e boas prácticas para mellorar as carreiras das docentes e investigadoras (PDI) da USC. Conciliación e competitividade