Última actualización
23/07/2026
O Instituto Galego de Física de Altas Enerxías (IGFAE) abre o proceso de selección para cubrir o posto de dirección do Instituto. A incorporación prevista sería o primeiro semestre de 2027.
O IGFAE é un centro mixto da Universidade de Santiago de Compostela e da Xunta de Galicia dedicado á investigación de excelencia en física de partículas, física nuclear, astropartículas e áreas relacionadas, desde perspectivas teóricas, experimentais e tecnolóxicas. O centro está abrindo, ademais, unha nova liña en ciencia e tecnoloxías da información cuántica, impulsada por un recente convenio co Centro de Supercomputación de Galicia, CESGA.
Neste momento, a actividade científica do Instituto organízase arredor de tres áreas estratéxicas: O Modelo Estándar ata os seus límites; Partículas cósmicas e física fundamental; e Física nuclear desde o laboratorio para mellorar a saúde das persoas. O IGFAE participa en grandes colaboracións, experimentos e infraestruturas internacionais e abrangue desde a investigación fundamental sobre os constituíntes elementais da materia e as interaccións fundamentais ata as súas aplicacións tecnolóxicas.
A súa misión inclúe tamén a formación de novas xeracións de persoal investigador, a atracción de talento, a transferencia de coñecemento, a innovación e a promoción da cultura científica, así como o retorno industrial das grandes infrastruturas internacionais nas que participa, unha das señas de identidade do centro. O Instituto foi recoñecido como Unidade de Excelencia María de Maeztu en 2017 e obtivo unha segunda acreditación para o período 2024-2030. Forma parte, así mesmo, da rede CIGUS de centros de investigación de excelencia da Xunta de Galicia. No ano 2025 foi inaugurada a sede do IGFAE, ampliando significativamente tanto o espazo físico dispoñible como as capacidades do centro.
A apertura desta sede significou o inicio dunha nova etapa para o centro, con maiores capacidades nos laboratorios experimentais para asumir os grandes retos da física dos próximos anos; cun deseño moderno e aberto, que percura unha maior integración interna, así como unha maior apertura ao exterior; e cunha organización dos espazos que promove a atracción de talento, que impulse novas liñas de investigación, e o seu desenvolvemento no centro.
A persoa que asuma a Dirección deberá liderar esta nova etapa do Instituto, consolidar os avances acadados, reforzar a súa posición internacional e promover unha visión científica ambiciosa, integradora e sostible para os próximos anos.
O inglés é unha lingua habitual de traballo no IGFAE. Para o exercicio efectivo das funcións de Dirección será necesario contar cun coñecemento funcional do galego ou do castelán, ou asumir o compromiso de adquirilo nun prazo razoable desde a incorporación.
Corresponderá á persoa que exerza a Dirección:
Exercer as demais funcións que lle correspondan de acordo coa normativa e co sistema de goberno do IGFAE.
As candidaturas deberán incluír a seguinte documentación, redactada en inglés:
A documentación deberá enviarse por vía electrónica a directorcall2026@igfae.gal con data límite o 15 de outubro de 2026.
Consultas informais sobre a convocatoria poderán dirixirse á dirección do IGFAE: carlos.salgado@usc.gal ou director@igfae.gal; e/ou á vicerreitoría de Investigación e Ciencia Aberta da Universidade de Santiago de Compostela: vr.investigacion@usc.gal. Tanto as consultas como as candidaturas serán tratadas de maneira confidencial.
O IGFAE promove a igualdade de oportunidades e está comprometido coa creación dun contorno de traballo diverso, inclusivo e respectuoso. Anímase especialmente a presentar a súa candidatura ás mulleres e ás persoas pertencentes a colectivos actualmente infrarrepresentados nos ámbitos da investigación e da dirección científica.
O nomeamento terá unha duración inicial de catro anos, prorrogable de acordo coa normativa e cos procedementos de avaliación establecidos polos órganos de goberno do IGFAE e pola Universidade de Santiago de Compostela.
No caso de que a persoa seleccionada non manteña, no momento da súa selección, unha relación laboral coa Universidade de Santiago de Compostela, o seu nomeamento quedará supeditado á formalización dun acordo de adscrición coa súa institución de orixe ou, de ser o caso, o establecemento dunha relación contractual coa universidade.
A incorporación está prevista para o primeiro semestre de 2027.
O Scientific Advisory Board (SAB) do IGFAE será o órgano encargado de avaliar as candidaturas presentadas e poderá elaborar unha lista reducida de persoas candidatas para a realización de entrevistas.
As persoas incluídas na lista reducida poderán ser convidadas a presentar diante do SAB a súa traxectoria e a súa visión científica, estratéxica e organizativa para o Instituto.
Tras completar o proceso de avaliación, o Scientific Advisory Board emitirá un informe preceptivo, pero non vinculante, que será remitido aos órganos competentes, en particular, á Xunta de Goberno do IGFAE, órgano que proporá o seu nomeamento.
O nomeamento da persoa titular da Dirección será realizado pola reitora da Universidade de Santiago de Compostela, de acordo co procedemento establecido no Regulamento de réxime interno do IGFAE e as normas propias da Universidade, así como, de ser o caso, da Rede de centros CIGUS.
O proceso de selección rexerase polos principios de mérito, capacidade, transparencia, igualdade de oportunidades e non discriminación. Adoptaranse as medidas necesarias para identificar e xestionar posibles conflitos de interese.
[Este calendario é puramente orientativo e podería sufrir modificacións]