As áreas de investigación do IGFAE procuran respostas a algunhas das cuestións fundamentais da natureza. As escalas de tempo nas que se desenvolve esta ciencia básica son, en ocasións, extremadamente amplas. Con todo, a innovación e o desenvolvemento tecnolóxico adquirido para levar a cabo estas investigacións pode ofrecer un gran servizo á sociedade.
Con ocasión da anterior acreditación de excelencia María de Maeztu, o IGFAE puxo en marcha o programa IGNITE, que tiña como obxectivo explorar novas vías de investigación e fomentar a transferencia de tecnoloxía entre o persoal do centro. IGNITE ofreceu financiamento para sementar as raíces de novas actividades aliñadas coa estratexia científica do Instituto.
Neste marco, o IGFAE creou en 2021 a súa propia Unidade de Innovación, Coñecemento e Transferencia de Tecnoloxía (KTT), co compromiso de reforzar as liñas de colaboración externas coa industria e a sociedade. Do mesmo xeito, esta Unidade ofrece ao persoal investigador do IGFAE as oportunidades precisas para establecer conexións co tecido industrial, desenvolver acción de protección intelectual ou crear spin-offs ou start-ups ao abeiro da ciencia que se fai no Instituto.
O equipo da Unidade KTT está capacitado para identificar resultados de investigación transferibles, avaliar o potencial comercial, a propiedade intelectual, xestionar os contratos de transferencia de resultados, apoiar e asesorar as iniciativas industriais, a formación de executivos, e tamén proporcionar formación relacionada con KTT.
Ademais, esta Unidade mantén unha estreita colaboración coa área de Valorización, Transferencia e Emprendemento da USC, que é o servizo encargado da difusión e promoción da cultura KTT entre a comunidade universitaria.
