Esta convocatoria interna ten o obxectivo de estimular ideas innovadoras e a colaboración multidisciplinar entre os distintos programas de investigación do IGFAE, cun claro enfoque na transferencia de tecnoloxía. Trátase dun dos puntos clave do novo plan estratéxico do Instituto.
Durante o ano 2025 lanzarase unha nova edición do programa IGNITE, co obxectivo de identificar novos proxectos susceptibles de financiamento e abrir novas liñas de investigación no centro.
As propostas poderán incluír colaboradores externos (en particular doutros centros singulares da USC e o Centro de Supercomputación de Galicia), que poidan achegar o coñecemento preciso para o proxecto, e abrindo tamén a porta a un posible cofinanciamento. As candidaturas serán avaliadas por un comité creado para esta convocatoria, que poderá asesorado por avaliadores externos. Darase prioridade ás propostas presentadas por persoal femenino e/ou non permanente (programas Ramón y Cajal e Global Talent).
IGNITE será unha ferramenta esencial para impulsar aínda máis a cooperación entre as distintas áreas estratéxicas e programas de investigación do IGFAE. Todos os proxectos contarán tamén co apoio da Unidade de Transferencia de Tecnoloxía, co obxectivo de estimular o achegamento da ciencia desenvolvida no Instituto ao sector empresarial.