O Instituto Galego de Física de Altas Enerxías (IGFAE), un centro mixto da Universidade de Santiago de Compostela e da Xunta de Galicia, convoca de novo en 2026 o seu programa de Bolsas de Verán. O obxectivo desta convocatoria é promover as primeiras experiencias investigadoras entre o estudantado de grao, atraendo alumnado de alto nivel interesado en participar en actividades formativas extracurriculares integradas nun proxecto científico.

Ofrécense un mínimo de 6 bolsas.

As persoas seleccionadas pasarán a formar parte das actividades cotiás do IGFAE, un centro recoñecido como Unidade de Excelencia María de Maeztu pola Axencia Estatal de Investigación e membro da rede CIGUS da Xunta de Galicia, que distingue a calidade e o impacto da súa investigación. As solicitudes poderán presentarse a calquera das áreas de investigación do centro, entre as que se inclúen a física de partículas, a física de astropartículas e nuclear, a ciencia e tecnoloxía cuánticas, así como á unidade de xestión e aos equipos de comunicación e divulgación científica.

1. As estadías terán unha duración dun mes, preferentemente do 1 ao 31 de xullo de 2026. A dedicación semanal será de 30 horas, cun horario que se acordará coa persoa investigadora responsable da supervisión.
2. Cada bolsa estará dotada con 800 € brutos (ou a parte proporcional no caso de que a estadía sexa inferior a un mes), aos que se lles aplicarán as retencións fiscais correspondentes.
3. Se a estadía se realiza no período preferente (do 1 ao 31 de xullo), a bolsa incluirá o aloxamento nun cuarto individual dunha residencia universitaria integrada no Sistema Universitario de Residencias da Universidade de Santiago de Compostela ou nunha alternativa equivalente.
4. Establécese unha axuda para desprazamentos destinada ás persoas participantes que residan fóra de Santiago de Compostela: ata 80 € para estudantes de Galicia, ata 500 € para estudantes doutras partes do Estado español e ata 2.000 € para estudantes internacionais, de acordo cos prezos de mercado e sempre que exista dispoñibilidade orzamentaria. Todos os gastos deberán xustificarse mediante a documentación acreditativa correspondente.
5. Poderán cubrirse tamén os gastos relacionados coa obtención da documentación necesaria para a estadía en España, a alta na Seguridade Social e a apertura dunha conta bancaria válida para recibir a dotación económica.
6. Calquera gasto deberá comunicarse previamente, e o seu reembolso estará condicionado á aprobación da dirección do IGFAE.