O IGFAE convoca as Bolsas de Verán 2025 para alumnado de grao universitario

O Instituto Galego de Física de Altas Enerxías (IGFAE), centro mixto da Universidade de Santiago de Compostela e a Xunta de Galicia, convoca un ano máis o seu programa de Bolsas de Verán. O obxectivo destas bolsas é fomentar a iniciación á investigación entre o alumnado de grao universitario, atraendo a estudantes de alto nivel que teñan interese en desenvolver prácticas formativas extracurriculares no marco dun proxecto científico.

Deste xeito, as persoas seleccionadas integraranse na actividade cotiá do IGFAE, centro acreditado como Unidade de Excelencia María de Maeztu pola Axencia Estatal de Investigación, e membro da rede CIGUS da Xunta de Galicia, que recoñece a calidade e impacto da súa investigación. As solicitudes poderán dirixirse a calquera das áreas de traballo do centro, como son a física de partículas, astropartículas e nuclear ou a ciencia e tecnoloxía cuánticas, así como na unidade de xestión e labores de comunicación ou divulgación.

O prazo de solicitudes abrirase o venres 6 de xuño, e pecharase o 12 de xuño ás 23.59 (CEST).

Ligazón á convocatoria
Ligazón ao formulario de solicitudes

Convócanse un mínimo de 10 prazas, nas seguintes condicións:

1. A nota media do seu expediente académico debe ser igual ou superior a 8 puntos sobre base 10, debendo ter superado polo menos o 55 % dos créditos da titulación. No caso das persoas que non obtivesen o seu título en España, é preciso calcular e achegar a cualificación equivalente usando estas instrucións: https://i.gal/equivalence
2. Estar cursando un dos dous últimos anos de calquera grao no Espazo Europeo de Ensino Superior (EEES) ou calquera outro sistema universitario. Resérvanse 2 bolsas para o alumnado que non curse graos en Física, Enxeñarías, Matemáticas, Química ou titulacións equivalentes (graos FQEM) e 8 para alumnado que curse graos FQEM.
3. No caso de que non se concedan as 2 bolsas reservadas no punto anterior a persoas que non cursen graos FQEM, poderán concederse a alumnado que curse graos FQEM. O número de bolsas concedidas a persoas que non cursen graos FQEM non poderá ser superior ao número de bolsas concedidas a persoas que cursen grados FQEM.
4. Os criterios de selección e adxudicación establécense sobre unha puntuación máxima de 10 puntos: o 70% da valoración será o expediente académico; un 20 %, polo currículo vítae (publicacións, premios e formación relacionada coa bolsa); e un 10%, pola expresión de interese carta de presentación.
5. As prácticas desenvolveranse durante un mes, preferentemente do 1 ao 31 de xullo de 2025. A xornada será de 30 horas á semana, e o horario acordarase co persoal investigador responsable de cada proxecto.
6. A bolsa ten unha contía de 800 € brutos (ou a parte proporcional no caso de que a estadía sexa inferior a un mes), á que se aplicarán as retencións correspondentes segundo a lexislación.
7. Sempre que a estadía se realice no período preferente, a bolsa inclúe o aloxamento en cuarto individual nunha residencia do Sistema Universitario de Residencias da Universidade de Santiago de Compostela, ou alternativa equivalente.
8. Ofrécense axudas de desprazamento para as persoas que residan fóra de Santiago de Compostela: ata 80 € para alumnado de Galicia; ata 500 € para alumnado de fóra de Galicia; e ata 2.000 € para alumnado doutros países, de acordo cos prezos de mercado das viaxes e sempre que as posibilidades orzamentarias o permitan. As axudas deberán xustificarse con documentos que acrediten os gastos.
9. Cubriranse os custos derivados de calquera trámite relacionado coa obtención dos documentos que autoricen a estadía en España, o rexistro na Seguridade Social e obtención dunha conta bancaria válida para a percepción da axuda.
10. Calquera custo debe de ser previamente comunicado e o seu reintegro está supeditado á aprobación da dirección do IGFAE.

 Sobre o IGFAE

O Instituto Galego de Física de Altas Enerxías (IGFAE), é un centro de investigación creado en 1999 pola Universidade de Santiago de Compostela e a Xunta de Galicia. Naceu co obxectivo de coordinar e fomentar a investigación científica e técnica nos campos da Física de Alta Enerxía, Partículas e Nuclear, e áreas relacionadas como a Astrofísica, a Física Médica ou a Instrumentación. Acolle a arredor de 140 persoas que participan en instalacións experimentais como o CERN, o Observatorio Pierre Auger, LIGO ou GSI/FAIR, entre outras.

O centro foi acreditado en dúas ocasións (2017 e 2023) como Unidade de Excelencia María de Maeztu por parte da Axencia Estatal de Investigación do Goberno de España. Tamén forma parte da rede CIGUS da Xunta de Galicia, que acredita a calidade e o impacto da súa investigación. Está cofinanciado pola Unión Europea a través do Programa Galicia Feder 2021-2027.

O IGFAE é unha institución que ofrece igualdade de oportunidades e comprométese a aumentar a diversidade do seu persoal, polo que acolle con especial satisfacción as solicitudes de mulleres, minorías e persoas con discapacidade. O IGFAE dispón dun Plan de Igualdade e Diversidade e traballa activamente para aumentar o equilibrio de xénero, xeográfico e de minorías dentro do instituto. Ofrecemos un horario flexible para conciliar a vida laboral e familiar.

Para máis información: jobs@igfae.usc.es