{"id":12512,"date":"2022-11-23T15:50:11","date_gmt":"2022-11-23T13:50:11","guid":{"rendered":"https:\/\/igfae.usc.es\/~igfae-old\/o-exdirector-do-cern-rolf-heuer-visita-santiago-convidado-polo-igfae-para-conmemorar-os-10-anos-do-descubrimento-do-boson-de-higgs\/"},"modified":"2022-12-09T16:23:08","modified_gmt":"2022-12-09T14:23:08","slug":"o-exdirector-do-cern-rolf-heuer-visita-santiago-convidado-polo-igfae-para-conmemorar-os-10-anos-do-descubrimento-do-boson-de-higgs","status":"publish","type":"post","link":"https:\/\/igfae.usc.es\/~igfae-old\/es\/o-exdirector-do-cern-rolf-heuer-visita-santiago-convidado-polo-igfae-para-conmemorar-os-10-anos-do-descubrimento-do-boson-de-higgs\/","title":{"rendered":"O exdirector do CERN Rolf Heuer visita Santiago convidado polo IGFAE para conmemorar os 10 anos do descubrimento do bos\u00f3n de Higgs"},"content":{"rendered":"

O Libro de Honra da USC conta desde esta ma\u00f1\u00e1 cunha firma m\u00e1is dun dos f\u00edsicos de part\u00edculas m\u00e1is importantes da actualidade. Rolf Heuer, exdirector xeral do CERN, a Organizaci\u00f3n Europea para a Investigaci\u00f3n Nuclear que opera o maior acelerador de part\u00edculas do mundo, visita por primeira vez Santiago de Compostela e Galicia estes d\u00edas convidado polo Instituto Galego de F\u00edsica de Altas Enerx\u00edas, centro mixto da USC e a Xunta de Galicia. Heuer foi recibido este m\u00e9rcores 23 no Colexio San Xerome polo director do IGFAE Carlos Salgado, o reitor da USC Antonio Lopez e o vicerreitor de Pol\u00edtica Cient\u00edfica, Vicente P\u00e9rez Mu\u00f1uzuri. A firma prod\u00facese un d\u00eda antes da conferencia que pronunciar\u00e1 ma\u00f1\u00e1 xoves con motivo da V Semana da Ciencia do IGFAE e tratar\u00e1 sobre o d\u00e9cimo aniversario do descubrimento do bos\u00f3n de Higgs.<\/p>\n

Heuer segue o ronsel de prestixiosos f\u00edsicos e f\u00edsicas que protagonizaron as Semanas da Ciencia anteriores como Gabriele Veneziano (pai da teor\u00eda de cordas), Lyn Evans (director do Large Hadron Collider), Gabriela Gonzalez (portavoz da colaboraci\u00f3n LIGO cando se anunciou a detecci\u00f3n de ondas gravitacionales) e Iv\u00e1n Mart\u00ed Vidal (responsable do grupo que obtivo a polarizaci\u00f3n da luz do primeiro buraco negro fotografado, M87*). Pola ma\u00f1\u00e1 tam\u00e9n mantivo un encontro co persoal do IGFAE no que puido co\u00f1ecer as s\u00faas li\u00f1as estrat\u00e9xicas de investigaci\u00f3n e as colaboraci\u00f3ns cient\u00edficas internacionais, mostrando especial interese no experimento R3B do centro de investigaci\u00f3n FAIR en Alema\u00f1a, o experimento LHCb do CERN en Xenebra ou os futuros experimentos de neutrinos DUNE en Estados Unidos e HyperKamiokande en Xap\u00f3n.<\/p>\n

A divulgaci\u00f3n cient\u00edfica, motivo principal da s\u00faa visita<\/strong><\/p>\n

Na reuni\u00f3n Heuer tam\u00e9n resaltou a importancia da divulgaci\u00f3n cient\u00edfica e de achegar \u00e1 sociedade os resultados de investigaci\u00f3n, ademais de fomentar o interese pola f\u00edsica nos m\u00e1is novos. Seguindo este compromiso, esta tarde \u00e1s 20:30h na nave de Vid\u00e1n ser\u00e1 un dos relatores que participar\u00e1 na NerdNite tem\u00e1tica do bos\u00f3n de Higgs coorganizada polo IGFAE, xunto aos investigadores Jos\u00e9 Edelstein e Pier Paolo Giardino.<\/p>\n

O programa da s\u00faa visita pola V Semana da Ciencia do IGFAE compl\u00e9tase ma\u00f1\u00e1 cunha conferencia para p\u00fablico xeral sobre o d\u00e9cimo aniversario do descubrimento do bos\u00f3n de Higgs. Heuer explicar\u00e1 algunha das claves e a importancia desta part\u00edcula fundamental para entender o universo primitivo. O evento ter\u00e1 lugar no auditorio Abanca (R\u00faa Preguntoiro, 23) \u00e1s 20:00h e a entrada \u00e9 libre ata completar aforo, con reserva previa nesta ligaz\u00f3n (bit.ly\/conferenciaheuerIGFAE<\/a>). A conferencia ser\u00e1 en ingl\u00e9s con traduci\u00f3n simult\u00e1nea ao castel\u00e1n.<\/p>\n

Unha traxectoria dedicada aos aceleradores de part\u00edculas<\/strong><\/p>\n

Rolf-Dieter Heuer (G\u00f6ppingen, Alema\u00f1a, 1948) estudou f\u00edsica na Universidade de Stuttgart e doutorouse na Universidade de Heidelberg. De 1978 a 1983, foi f\u00edsico investigador na Universidade de Heidelberg, traballando no anel de almacenamento de electr\u00f3ns-positr\u00f3ns PETRA como membro da colaboraci\u00f3n JADE. De 1984 a 1998, foi membro do CERN, traballando para a colaboraci\u00f3n OPAL no Gran Colisionador de Electr\u00f3ns e Positr\u00f3ns (LEP). Dende 1994, foi o voceiro da colaboraci\u00f3n.<\/p>\n

Parte da s\u00faa carreira estivo relacionada coa construci\u00f3n e o funcionamento de grandes sistemas de detectores de part\u00edculas para estudar colisi\u00f3ns electr\u00f3n-positr\u00f3n. Ao deixar o CERN en 1998, asumiu unha c\u00e1tedra na Universidade de Hamburgo, onde estableceu un grupo que traballa na preparaci\u00f3n de experimentos nun posible futuro colisionador lineal de electr\u00f3ns e positr\u00f3ns. Ao asumir o seu nomeamento como director de investigaci\u00f3n de f\u00edsica de part\u00edculas e astropart\u00edculas no DESY en 2004, Heuer foi responsable da investigaci\u00f3n no acelerador HERA, a participaci\u00f3n do DESY no LHC e a I+D para un futuro colisionador de electr\u00f3ns e positr\u00f3ns. En 2009 substitu\u00edu a Robert Aymar como director xeral do CERN e en 2015 Fabiola Gianotti pasou a ser a directora ata a actualidade.<\/p>\n