{"id":15717,"date":"2024-06-13T17:03:50","date_gmt":"2024-06-13T15:03:50","guid":{"rendered":"https:\/\/igfae.usc.es\/igfaedb\/o-conselleiro-roman-rodriguez-valora-o-salto-cualitativo-que-supora-para-o-igfae-a-nova-sede-do-centro\/"},"modified":"2024-06-13T17:03:50","modified_gmt":"2024-06-13T15:03:50","slug":"o-conselleiro-roman-rodriguez-valora-o-salto-cualitativo-que-supora-para-o-igfae-a-nova-sede-do-centro","status":"publish","type":"post","link":"https:\/\/igfae.usc.es\/igfaedb\/gl\/o-conselleiro-roman-rodriguez-valora-o-salto-cualitativo-que-supora-para-o-igfae-a-nova-sede-do-centro\/","title":{"rendered":"O conselleiro Rom\u00e1n Rodr\u00edguez valora o \u201csalto cualitativo\u201d que supor\u00e1 para o IGFAE a nova sede do centro"},"content":{"rendered":"

O conselleiro de Educaci\u00f3n, Ciencia, Universidades e Formaci\u00f3n Profesional, Rom\u00e1n Rodr\u00edguez Gonz\u00e1lez, visitou na ma\u00f1\u00e1 do xoves 13 de xu\u00f1o as novas instalaci\u00f3ns do Instituto Galego de F\u00edsica de Altas Enerx\u00edas (IGFAE), centro mixto da Universidade de Santiago de Compostela e a Xunta de Galicia. Na visita estivo acompa\u00f1ado polo reitor da USC, Antonio L\u00f3pez, o director do IGFAE, Carlos Salgado, o director cient\u00edfico asociado do centro, Abraham Gallas, e o secretario xeral de Universidades, Jos\u00e9 Alberto D\u00edez.<\/p>\n

Na s\u00faa visita, o titular do departamento de Ciencia do Goberno galego salientou que a ampliaci\u00f3n e renovaci\u00f3n das instalaci\u00f3ns do IGFAE ter\u00e1 por obxectivo aumentar a superficie dos laboratorios experimentais, espazos com\u00fans de traballo e \u00e1reas destinadas \u00e1s actividades de divulgaci\u00f3n. \u201cIsto vai supo\u00f1er un salto cualitativo nas instalaci\u00f3ns deste instituto, que forma parte da Rede de centros de Investigaci\u00f3n niversitaria de Galicia\u201d, sinalou o conselleiro.<\/p>\n

Na actualidade, o persoal do IGFAE ocupa xa parte das dependencias da nova sede, froito dun investimento de 4,8M\u20ac por parte da Xunta de Galicia ao abeiro do convenio entre a Conseller\u00eda e as tres universidades galegas para mellorar as s\u00faas infraestruturas de investigaci\u00f3n. As obras, cuxa finalizaci\u00f3n est\u00e1 prevista para finais de 2024, far\u00e1n que o IGFAE incremente nun 70% a s\u00faa superficie previa.<\/p>\n

\"\"

Fotograf\u00edas: Santi Alvite \/ USC.<\/p><\/div>\n

Centro de relevancia internacional<\/strong><\/p>\n

Despois do percorrido polas novas instalaci\u00f3ns, Rom\u00e1n Rodr\u00edguez destacou o potencial do IGFAE, \u201co \u00fanico centro de investigaci\u00f3n galego que conta coa acreditaci\u00f3n como Unidade de Excelencia Mar\u00eda de Maeztu, que ademais v\u00e9n de revalidar\u201d. O conselleiro incidiu na \u201cmarca de calidade que esta distinci\u00f3n estatal imprime \u00e1 actividade que se realiza nel, e que lle abre as portas a seguir participando en proxectos internacionais de tanta relevancia como os desenvolvidos en colaboraci\u00f3n coa Organizaci\u00f3n Europea para a Investigaci\u00f3n Nuclear (CERN) en Xenebra\u201d.<\/p>\n

Esta acreditaci\u00f3n de excelencia facilita, as\u00ed mesmo, a formaci\u00f3n de persoal investigador e a captaci\u00f3n de talento a nivel internacional. As\u00ed, case o 30% dos 103 investigadores do IGFAE \u00e9 persoal captado do estranxeiro. O centro mant\u00e9n, ademais, unha elevada porcentaxe de \u00e9xito en convocatorias de alto prestixio, como as do European Research Council (ERC), Marie Sklodowska-Curie e Ram\u00f3n y Cajal, que agardan reforzar coa renovaci\u00f3n da acreditaci\u00f3n.<\/p>\n

Celebraci\u00f3n do 25\u00ba aniversario<\/strong><\/p>\n

\u00c1 apertura da nova sede e o dobre reco\u00f1ecemento de excelencia auton\u00f3mico e estatal s\u00famase, neste 2024, a celebraci\u00f3n do 25\u00ba aniversario do IGFAE. No marco desta efem\u00e9ride, o IGFAE desenvolver\u00e1 un amplo programa de actividades abertas \u00e1 sociedade, co obxectivo de dar a co\u00f1ecer o labor cient\u00edfico realizado no centro. Estas acci\u00f3ns po\u00f1er\u00e1n especial acento no v\u00ednculo entre a ciencia e as artes, na li\u00f1a do cami\u00f1o aberto desde hai anos nos IGFAE Labs.<\/p>\n

A primeira destas actividades ter\u00e1 lugar o vindeiro 21 de xu\u00f1o, coa inauguraci\u00f3n, na Igrexa da Universidade de Santiago de Compostela, dunha exposici\u00f3n organizada en colaboraci\u00f3n co programa de arte do CERN, Arts at CERN, e que conmemora tam\u00e9n os 70 anos da fundaci\u00f3n desta instituci\u00f3n.<\/p>\n\n\t\t